دليلك الشامل لكيف تكون فنان فاشل!

تبغى تصير فنان محد يبغا يتعاون معاه ؟ تبغى  تخلي المخرج يراجع قراراته المهنية وممكن الحياتية  ؟  تبغى زملائك  دايما يتذكروك  في دعائهم… لكن ابدا مو بالخير ؟  نقدم لك الآن !!! 

✨ الدليل الشامل لكيف تكون فنان فاشل ✨

حصريا في ٥ خطوات فقط، الآن تقدر تصير فنان فاشل! لا تخاف النتائج حتكون مضمونة لو اتبعت الخطوات التالية : 

الخطوة الأولى : خلي الكل يستناك ! 🕰️

لو حاب تكون فنان مزعج تعود توصل متأخر…. بس خلنا نتكلم جد شوي، الالتزام بالوقت في البروفات مو رفاهية، هو احترام لوقتك ولوقت غيرك، المسرح يعتمد على التوقيت، وأي تأخير فهو تراكمي لأن كل شخص مرتبط بشخص آخر . 

الخطوة الثانية : النرجسية الي الله يحرمنا منها ! 🪞

خليك نجم الليلة الكل يشتغل عشانك والكل ادوات لك …. لا ! في المسرح، ما في نجم يلمع لحاله. إذا ما كنت تبني على أفكار غيرك، أو على الأقل ما تهدمها، فأنت قاعد تسوي شي غلط.  دايم ابني على افكار غيرك قول “نعم و…” بدل “لا بس…”

الخطوة الثالثة :  اصلن محد يستاهل عبقريتك  ! 🧠

اديهم نص طاقة ونص حفظ وبريالين جدية….. لازم تعرف ان فيه  فرق كبير بين إنك تكون فنان جاد وإنك تكون بارد ومهمل. البروفة تحتاج طاقة جماعية وحس بالمسؤولية وتجهيز وشغف مسبق يبدأ من المنزل مو ” اي مشهد حنسوي اليوم؟”

الخطوة الرابعة :  الكل يغار منك  ! 🥊

احد عطاك ملاحظة؟ لا تسكت له انتا طوفه هبيطة ؟! …. من صفات الفنان الفاشل يقنع نفسه بأن أي رأي غير رأيه هو مؤامرة عليه بس لو حاب تصير فنان حقيقي، لازم تفهم إن النقد أداة سحرية للنجاح للي يسمع ويتأمل ويتطور .

الخطوة الخامسة: لا تنسى القواعد اللي قبل! ✨

أوه ! وصلت هنا؟ ممتاز هذا لحاله إنجاز… لأن على الاغلب انتا فنان حقيقي يغار على شغله ويبغى يتعلم، ويشتغل على نفسه. كل قاعدة مرت هنا يمكن كانت مكتوبة بسخرية…  لكن ابدا لا تنسى القواعد وراجعها كل فترة وفترة. 

في الأخير الفنان مو اللي ماعنده اغلاط ، لكن اللي عنده الشجاعه يصحح وإذا كنت من هذا النوع…
فـ إحنا في فِنِك نرحب فيك في مجتمعنا  👏